讀者投稿《宇宙最強老爺奶奶篇》超長篇
6299 背景- 係勁傳統的福建人，佢地亦在福建出生，之後落根香港，十幾歲先嚟香港。
62：吹水怪一名，成日同人吹，佢之前好有錢，成日拎本存摺比人睇佢幾有錢（個本存摺，實情係，佢曾經係有錢過，不過最後係已經被消户，但唔衰得，成日比人睇），佢自稱被人害，成間廠無左（實情係佢衰賭），自此，就唔做嘢等99養。
99：個老公叫佢落街買煙就買煙，買馬就買馬，唔敢反抗個老公，原本都無咩打過工，但個老公無收入，被迫出社會打工養家。
C6: 香港出世，尚算正常。
C6細佬：廢青一個，仲好天真相信佢老豆爛船都有3分釘，不學無術，都唔知讀左幾多年先大學畢業，最正係成日覺得自己好叻好醒。
1. 初次見面
我初初第一次見我6299，佢地就同我投訴，話我老公，出左社會做嘢，一豪子家用都無比過佢地兩老，當年我老公岩岩畢業，入左四大銀行做MT,以當時的人工成1.5萬一個月，其實已經好好，個次見面後，我就問我老公，點解你一豪子都唔比佢地，甘不孝，當時我老公就話你遲下就會明，點解我唔比家用，之後大約半個月左右，我老公話，今晚我屋企人叫食飯，不過佢事前同我講明，全都係由福建直送，全部講福建話，我問心堅唔想去，飯局開始啦，足足3台人，我同我老公，就全程好似答台食飯甘，好啦，到埋單個陣，我6299，就同班人講，我個仔好呢咖，一畢業就入左某大銀行，今晚佢請，埋單$7000，之後我老公就look card, 我老公同我講，其實呢3台人，我無個係識ga,我就好奇問，呢班係咩人，老公話問左99，係62之前做生意的同村兄弟👬⋯⋯仲要由我老公畢業開始，呢張單就交比我老公埋，如是者，持續成年，因為支出大，所以我老公唔會再另比家用。後來，老公都被我催眠到，甘樣個個月請班3唔識7的人食飯，好無謂，過左一年倒，我老公終於say no唔再比。
2. 置業
我同老公，打算一齊買左樓先結婚，由於我的職業關係，我當時識好多地產agent,當時個agent 介紹左個筍盤比我，當年4M買到將軍澳地鐵站上蓋3房，當年時值要成5M, 平成1M , 甘我地就決定入市，由於我做個間bank，員工息口堅抵，但規定左，未婚員工只可單名買，先可以拎到呢個優惠，所以我地就用單名買，我地當時計過，兩個做9成按揭，絕對無問題，可以上到會，所以我地都無打算要4大長老出一豪子，但買完呢層樓，我地就要儲返3、5、7年錢先結婚，由於呢個決定真係好大，買得呢層樓，我地兩個都好似認定左對方甘，所以就約左4大長老見面，見面個陣，我媽突然話，洗咩做9成按揭，我比150萬出嚟，買左樓，就結婚啦，唔準同居（我係獨生女），之後我62就出聲，其實我都可以出小小嘅，不過一定要加埋我個仔個名！之後我呀媽就問我62，甘你出幾多？老爺就話要計計先，甘我地見甘理想，我就比細訂，之後我地都照申請9成按揭，因為都唔打算用4大的錢，到比大訂前我媽過左150萬比我，我見我媽已比錢我，我就問我老公，62又話出錢嘅？錢呢？之後我老公就話，算啦，反正我地有能力，做咩要佢地錢，當時我就覺得好古怪，就迫我老公講，原來62返到屋企就同我老公講，佢可以出到5萬，呢下，堅嬲到爆，之後我都算，無錢唔緊要，唔好拎呢樣嘢嚟死沖，死要面子啦，如果當年我真係一心打算靠我呢個62，我諗我已經撻左訂，樓都買唔成🙈
3. 入伙
入伙時，我見我62甘煩，所以我就分開男女家食算，個時我都已經比返曬錢我媽，無要過佢，我99就好似審犯甘，問我屬咩，之後我就答左，我99第一句就答，你同我地相剋，之後，佢地兩老就同我老公用福建話講嘢，佢地以為我唔識聽，但之前我在英國讀書，我同學識福建話，當時無嘢做咪學下，所以我識聽6-7成，當然我老公知，但6299唔知我識，我6299同我老公講，佢同我地相克，我地要一齊住，幫你教下佢，仲有，你地第時離婚，一定要將層樓分一半，在律師樓簽定離婚協議⋯⋯本身我已經相反台，同埋我老公已經叫左佢地收聲，之後就不歡而散，之後我就同我老公講，既然未結婚，就講離婚，我唔會同你結婚，仲有，如果我媽真係出左150萬，你老豆先出得個5萬，有咩資格講分層樓一半先，咩道理呀！之後我地冷戰左成2星期，之後我老公話，父母我無得簡，佢地係甘，唔代表我係，之後我地就和好啦，過左大慨半個月左右，呢兩老突然殺上我地屋企，指指點點，又話張床點擺好，又話細佬訓邊間房好，之後就話，你知我地住緊個度，分分好好似隔離甘會冧樓，所以我地賣左層樓啦⋯之前咪同你地講左要一齊住，教下你點做生抱，同埋第時你地生個男丁，我地可以湊，你又唔洗請工人，益左我地甘。。。
當然佢地話搬入嚟，我就開始反擊，清清楚楚甘話比個家人知，其實層樓只係有我個名，你個仔只係做擔保人，一齊上會，之後我就掃曬佢地一家走，包括我老公，大不了，咪分手，我驚都未驚過⋯後來，佢地真係賣左層舊樓，當時賣得約200萬左右，我6299又玩嘢，之後問都無問過我老公，就買左另一層樓，價值約600萬，其實我6299根本就無錢，到左佢地兩個比曬3成大訂，先通知我老公，叫我老公幫佢地上會，其實如果我老公唔做我層樓擔保人，入息都夠批30年，由於，我老公當時求我，反正我有我呀媽150萬，叫我還曬佢，就可以唔洗佢做擔保人，佢就負責曬我所有的罰息，重新再做按揭契的錢，甘我就算，反正我呀媽都本身打算比錢我，甘我都唔想做到甘絕，一切就跟我老公意思做，始終個度都成200萬，唔係一個細數目，最終我6299就搬左入新屋，當然層樓係我老公供啦，名就寫左佢個廢物細佬度！當時個廢物細佬仲無限復活甘讀緊year 1，到最後仲由港大轉科轉系，轉到教院讀，足足用左都唔知6年定7年先大學畢業，後來，我同我老公都拉拉扯扯左3年，而我同老公，仍然保持財政獨立，佢有佢供樓，我有我自己供，各不相干，因為甘，我都無再理我6299 ，無見面3年，因為佢地太煩，我都無打算結婚，打算一直保持現狀就算。
4. 結婚
其實，都算係計劃之內嘅，因為我地兩個都鐘意小朋友，同埋加上我老公都應承左我，只要我唔鐘意，可以唔洗點見男家，但起碼都要通知佢地，況且，我地本身都打算，有左就會結婚，甘我老公就同6299講，我地打算結婚，同埋有左，之後，佢地兩個就不停甘話，一定係仔，之後就仲話，佢地男家一定要擺酒，仲起碼60-70圍先可以請曬佢地班福建幫，仲要圍圍起碼1萬1圍，先有面，但錢從何來？佢地話到時拆人情，你地實夠錢埋單啦，驚咩呀！自從上次屈我老公，供左層新樓，我同老公都已經唔會再信佢地！所以我同我父母講好左，我地旅行結婚算啦，到最後，我用左一個方法就令到個兩老，唔再講擺酒，就係我陀緊係女，之後個兩隻嘢，一聽到係女，即刻同我老公講，睇定啲先啦，你保證個女係你咖？之後，我老公終於忍無可忍，爆左佢地一獲金，最後，我老公仲出埋絕招，逼佢細佬供返層樓（佢細佬係中學教師，絕對供得起層樓，但都死唔供）就係唔比錢供樓，直到銀行出最後通牒，話再唔供就收樓，佢細佬先死地地供返層樓，同比返無供個啲期數比銀行，因爲佢地無估到我老公甘絕⋯自此，我地一家三口，終於可以安安落落甘生活，一年先見我6299一次，好在上天比我生個女，我先可以脫離個兩隻宇宙最強6299。
#退一步海闊天高
#我的極品四大長老
Search